ஜாதகத்தில் சூரியன் நீச்சம் பெற்றால் வேலை கிடைக்காதா? தொழில் அமையாதா ?

ஜாதகத்தில் சூரியன் நீசன் ஆனால் அரசாங்கத்தில்  கடைநிலை ஊழியர்  வேலை கூட கிடைக்காது என்றார்களே உண்மையா?

கிரகங்களின் நாயகனாக விளங்கும் சூரியன் ஜோதிடத்தில் ஆத்ம காரகன் என்றும் தந்தை காரகன் என்றும் போற்றப்படுகிறார். மேலும் அரசு  அதிகாரிகள், உயர் பதவியில் இருப்பவர்கள், நாட்டுத் தலைவர்கள், நாட்டை ஆள்பவர்கள், நமக்கு தலைவராக இருப்பவர்கள் போன்றவர்களுக்கு சூரியன் காரகம் வகிக்கிறார்.

சூரியன் ஒரு ஜாதகத்தில் உச்சமாக இருந்தால் அல்லது 10ம் வீட்டில் திக் பலம் பெற்று காணப்பட்டால் ,அந்த ஜாதகருக்கு தலைமை தாங்கும் பண்பு இருக்கும். அரசாங்க உத்தியோகம் மற்றும் அரசாங்க ஆதரவு கிட்டும். தந்தையின் ஆதரவு இருக்கும். அதிகாரத் தோரணை இருக்கும். நல்ல உடல் வாகும் கம்பீரமான தோற்றமும் இருக்கும். அதிகாரப் பதவிகள் திடீர் என்று வந்து சேரும். மனோதிடத்துடன் செயல்படுவார். நிர்வாகத்திறன் சிறப்பாக இருக்கும்.

சூரியன் நீசம் அடையும் இடம் துலா ராசியாகும். ஆக, ஐப்பசியில் பிறந்த அன்பர்களுக்குத்  ஜாதகத்தில் துலா ராசியில் சூரியன் நீச்சம்  அடைந்து காணப்படுவார். இவர்களுக்கு தகப்பனாரின் ஆதரவும் அரசு உதவிகளும் கிடைப்பதில் தடங்கல்கள் ஏற்படும்.

சூரியன் ஒருவரது ஜாதகத்தில் நீசமாக இருந்தால் தந்தையுடன் கருத்து வேறுபாடுகள் இருக்கும். பொருளாதார ரீதியாக பல பிரச்சினைகளை சந்திக்க நேரிடும். தேவையற்ற அலைச்சல் இருக்கும். அரசாங்க ரீதியிலான ஆதாயங்கள் கிட்டாது. தனிமையில் இருக்க நேரிடும். சமூக அந்தஸ்து குறையும். அவமரியாதைகளை சந்திக்க நேரும். 

ஆனால் ஜாதகத்தில் துலாத்தில் சூரியன் நீச்சம் பெற்று காணப்பட்டாலும் , சூரியனுக்கு நீச்ச பங்க ராஜயோகம் ஏற்பட்டால் ராஜயோகமான வாழ்வு அமைகிறது.

ஜாதகத்தில் நீச்ச பங்க ராஜ யோகம் இருந்தால் , வாழ்க்கையில் சிரமப்பட்டுக்கொண்டிருக்கும் ஒருவருக்கு திடீர் ராஜயோகங்கள் ஏற்படும், விபரீத ராஜயோகம், நீசபங்க ராஜயோகம் ஏற்பட்டு அதன் மூலம் திடீர் கோடீஸ்வரர் ஆகி விடுவார்.  ஒரு கிரகம் நீசம் பெற்றால் பலன்கள் எதையும் கொடுக்காது என்பது ஜோதிட விதி ஆனால் நீசம் பெற்ற கிரகம் நீச பங்கம் பெறும்போது வலுவான நிலையை அடைந்து பெரும் பலன்களை தருகிறது.

இதனால் அவருக்கு எளிதில் தலைமை பதவிகள் தேடி வரும் சூழல் உண்டாகும்.‘எதிரிகளை அடக்கி ஆளும் திறன் கிடைக்கும்,

தொழில், உறவுகள் அல்லது தனிப்பட்ட குணங்கள் உள்ளிட்டவை உயர்ந்து நெருக்கம் அதிகமாகும்.

நீச்ச பங்க ராஜ யோகம், பலவீனமான கிரகத்துடன் தொடர்புடைய சவால்களை சமாளிக்க ஜாதகருக்கு உதவுகிறது, ஜாதகர்களின்  அசாத்திய திறனை  அவர்களுக்கு உணர வைக்க இந்த யோகம் அவர்களுக்கு  உதவும்.

சில புகழ் பெற்ற " கடைநிலை ஊழியர்"களின் சூரியன் நீசம் பெற்ற ஜாதகங்கள் உங்கள் பார்வைக்கு ;-

பில்கேட்ஸ் ஜாதகத்தில் சூரியன் நீசம் !

உலகிலேயே பணக்கார சூரியன் நீசம் பெற்ற கடைநிலை ஊழியர்  ! மைக்ரோசாப்ட் உரிமையாளர் பில் கேட்ஸ் ரிஷப லக்கினம் .மீன ராசி. இவருடைய ஜாதகத்தில் 4ம் அதிபதியான சூரியன் 6ம் இடத்தில நீச்சம். ஆனால் அங்கு சுக்கிரன் ஆட்சி பெற்று காணப்படுவதால் நீச்ச பங்க ராஜ யோகம். ஜாதகத்தில் நீசம் பெற்ற கிரகம் நீச பங்கம் பெறும் போது மிகவும் வலுவான நிலையை அடைந்து அபரிமிதமான யோக பலனைத் தருகிறது. நீசம் பெற்ற கிரகத்திற்கு வீடு கொடுத்த ராசி அதிபதி சுக்கிரன் ஆட்சி, உச்சம் பெற்றால் அது நீசபங்க ராஜ யோகம் என்ற அமைப்பைத் தருகிறது.

உலகில் உள்ள மற்ற நாடுகள், இந்த கடைநிலை ஊழியர்  சேவையை எதிர்பார்த்து நிற்கின்றனர் !

உலக அழகி ஐஸ்வர்யா ராய் ஜாதகத்தில் சூரியன் நீசம்

இந்த அழகிக்கு சூரியன் நீசம் !  இவர் ஒரு அழகான பெண்!

இவர் மட்டும் ஆளும் கட்சியில் சேர்ந்தால், இவருக்கு அரசாங்கம் ஆளுமை பதவியை தருவதற்கு தயாராக உள்ளது.

ஐஸ்வர்யா ராய் கன்யா லக்கினம் மற்றும் தனுசு ராசியில் பிறந்துள்ளார். இவருடைய 12 ம் அதிபதியான சூரியன் இவருடைய ஜாதகத்தில் 2ல் நீச்சம்.  நீச்சன் சூரியன் நின்ற ராசி நாதனான சுக்கிரன் கன்யா லக்கினத்திற்கு கேந்திர ஸ்தானமான 4ம் வீட்டில் நீச்ச பங்க ராஜ யோகம் பெறுகிறார். இதனால் தான் இவர் உலக அழகியாக தேர்ந்து எடுக்க. பட்டார்  மேலும் இன்றும் கலை துறையில் சாதனை படைத்தது வருகிறார்.

கலைஞானி கமல ஹாசன் ஜாதகத்தில் சூரியன் நீசம்

கலைஞானிக்கு சூரியன் நீசம், அதனால் தான் சினிமாவில் அவருக்கு கடைநிலை ஊழியர்  வேடம் அதிகம் கிடைக்கிறது ! கமல ஹாசன் சிம்ம லக்கினம் மற்றும் மீன ராசியில் பிறந்துள்ளார். இவருடைய ஜாதகத்தில் லக்கினாதிபதியான சூரியன் 3ம் இடத்தில நீச்சம் பெற்றுள்ளார். அங்கேயே சனி உச்சம் பெற்றதால் சூரியனுக்கு நீச்ச பங்க ராஜயோகம் அடைய பெறுகிறது.

என்ன கொஞ்சம் குஜாலான கடைநிலை ஊழியர்    !

தேர்தலில் நின்று சேவை செய்ய  டார்ச் லைட்டுடன் அலைகிறார் ! கண்டிப்பாக சேவையும் செய்வார்

 

நடிகை அமலா பால் ஜாதகத்தில் சூரியன் நீசம்

இவர்  கேரள கடைநிலை ஊழியர் ஆவார்.

நடிகை அமலா பால் தனுசு லக்கினம் ரிஷப ராசியில் பிறந்துள்ளார். இவருடைய ஜாதகத்தில் 9ம் அதிபதியான சூரியன் 11ல் நீச்சம்.. ஆனால் 11ம் அதிபதியான சுக்கிரனும் 9ம் அதிபதியான சூரியனும் பரிவர்த்தனை அடைந்து காணப்படுவதால் நீச்ச பங்க ராஜ யோகம் .

சிறந்த கலை சேவை செய்து சிறந்த சேவை செய்கிறார் !

இரும்பு மனிதர் சர்தார் வல்லபாய் படேல் ஜாதகத்தில் சூரியன் நீசம்

இவருக்கு சூரியன் நீசம்! படேல் மேஷ லக்கினம் மற்றும் விருச்சிக ராசியில் பிறந்தார். இவருடைய ஜாதகத்தில் 5ம் அதிபதியான சூரியன் 7ல் நீச்சம் ஆனால் நீச்சன் நின்ற ராசிநாதனான சுக்கிரன் 7ம் இடத்திலேயே ஆட்சி பெற்றதால் நீச்ச பங்க ராஜயோகம்.

உலகிலேயே மிக உயரமான மனிதராக நிற்கிறார் !

அரசில் உயர் பதவியில் இருந்த IRON MAN !

குபேரன் ஜாதகத்தில் சூரியன் நீசம்

ஒரு புராண கால ஜாதகம் !

திருப்பதி பாலாஜிக்கே "வாரா" கடன் கொடுத்தவர் !

 குபேரன் மீன லக்கினம் தனுசு ராசியில் பிறந்தவர் ஆவார். இவருடைய ஜாதகத்தில்  6ம் அதிபதியான சூரியன் 8ல் நேசம் . இத்தகைய அமைப்பு விபரீத ராஜ யோகம் என்று அழைக்க படும். நீச்சன் நின்ற ராசியாதிபதி  சுக்கிரன் லக்கின திரிகேந்திரம் ஏறியதால் நீச்ச பங்க ராஜ யோகம்.

ஹிட்லர்  ஜாதகத்தில் சூரியன் உச்சம்

சூரியன் உச்சம் !

வஞ்சப்புகழ் என்னும் வார்த்தைக்கு உதாரணம் ! ஹிட்லரின் ஜாதகத்தில் 11ம் அதிபதியான சூரியன் 7ல்  உச்சம். ஜாதகத்தில் சூரியன் உச்சம் பெற்றால் தலைக்கனம் ஏற்படும். மற்றவர்கள் சொல்வதை கேட்க மாட்டார்கள் . தாங்கள் சொல்வதையே மற்றவர்கள் கேட்க வேண்டும் என்று நினைப்பவர்கள் இவர்கள். இதனால்தான் ஹிட்லர் சர்வாதிகாரியாக திகழ்ந்தார்.  பல லட்சக்கணக்கான யூதர்களை ஈவு இரக்கமில்லாமல் கொன்று தீர்த்தவர். இரக்கமே இல்லாத மனிதராக இருந்தார் இவர்

ஸ்ரீ ராமர் ஜாதகத்தில் சூரியன் உச்சம்

ஸ்ரீ ராமர் கடக லக்கினம் மற்றும் கடக ராசியில் பிறந்தவர் ஆவார். இவருடைய ஜாதகத்தில் 2ம் அதிபதியான  சூரியன் 10ல்  உச்சம் . 4ம் இடத்தில சனி உச்சம் . உச்சம் பெட்ற சூரியனை உச்சம் பெட்ற சனி பார்ப்பதால் சூரியனுக்கு நீச்ச நிலை ஏற்படுகிறது. உச்சனை உச்சன் பார்த்தால் பிச்சை எடுக்கும் நிலை ஏற்படும்  என்று ஜோதிட நூல்கள் கூறுகிறது. இதனால் தான் இவர் அரச குலத்தில் பிறந்தாலும் 14 ஆண்டுகள் வனவாசம் செல்லும் நிலை ஏற்பட்டது.